गोधुली फुटबल रनिङकपः ६ पटकको विजेता धरान १९ पराजित, १८ र ११ नं वडा विजयी

दिव्य रोशनी(धरान)/ ६ पटक सम्म उपाधी जितिसकेको धरान १९ नं वडा धरानमा जारी गोंधुली फुटबल रनिङकपको २५ औं संस्करणको पहिलो खेलबाटै बाहिरिएको छ।
गोंधुली फुटबल रनिङकप अन्तर्गत भएको पाँचौ दिनको खेलमा धरान १८ संग ट्राईब्रेकरमा पराजित हुँदै धरान १९ प्रतियोगिताको पहिलो खेलबाटै बाहिरिएको हो।

सोमवार राती धरान रंगशालामा भएको पहिलो खेलमा धरान १९ नं वडाका प्रवेस राईले दोस्रो हाफको ११ औं मिनेटमा गोल गर्दै टिमलाई अग्रता दिलाएका थिए। तर मध्यान्तरपछिको खेलको ईन्जुरी समयमा धरान १८ का विनोद कुमार चौधरीले गोल गर्दै टिमलाई बराबरीमा ल्याईपुर्याएका थिए। निर्धारित समयसम्म दुवैतर्फबाट थप गोल नभएपछि खोलको निर्णय ट्राईब्रेकरबाट लिईएको थियो। जसमा धरान १८ का तर्फबाट निकेस राई, सौनक श्रेष्ठ र रोशन उरावले गोल गरेका थिएभने उज्जवल राई र विवेक परियार गोल गर्न असफल रहे। यसैगरी धरान १९ का तर्फबाट सनम लिम्बु र ईन्सन राईले गोल गरेभने आयम राई, अभिषेक राई र नामहाङ लिम्बु गोल गर्न सफल रहे। खेलमा धरान १८ का गोल किपर धिरज बस्नेत म्यान अफ दि म्याच घोषित भए। उनले नगद १५ सय हात पारे।

यसैगरी सोहिदिन भएको दोस्रो खेलमा धरान ११ नं वडा विजयी बनेको छ।
११ नं वडाले ३ नं वडालाई १ का विरुद्ध ३ गोल गर्दै विजयी बनेको हो। खेलमा धरान ३ का युनिक लिम्बुले पहिलो हाफको छैटौं मिनेटमा गोलगरी टिमलाई अध्यान्तरसम्म १–० को अग्रता लिएको थियो।
खेलको दोस्रो हाफमा धरान ११ ले ३ गोल गरेको थियो। जसमा प्रविन राईले १ गोल र पवन राईले २ गोल गरेका थिए। खेलको म्यान अफ दि म्याच धरान ११ का पवन राई घोषित भए। उनले नगद १५ सय हात पारे।
मंगलवारको पहिलो खेल धरान २० नं वडाका विरुद्ध १७ नं वडा र दोस्रो खेल धरान १३ का विरुद्ध ४ नं वडाका बिच हुने आयोजक संस्थाका उपाध्यक्ष सतिस केसीले बताए।
प्रतियोगितामा धरानका २० वटा वडामध्ये २ र ७ नं वडाले सहभागिता जनाएका छैनन्। प्रतियोगिताका विजेताले नगद १ लाख ५० हजार सहित रनिङ ट्रफि प्राप्त गर्नेछन्भने उपविजेता टिमले नगद ७५ हजार सहित ट्रफि र मेडल प्राप्त गर्नेछन्। यसैगरी विजेता तथा उपविजेता टिमलाई धरान १८ नं वडाका वडाअध्यक्ष नरेन्द्र कुमार राई (प्रविन) द्धारा थप २५/२५ हजार प्रदान गरिने भएको छ। यसैगरी प्रतियोगिताका व्यक्तिगत पुरस्कारहरुमा वेस्ट प्लेयरले नगद १५ हजार, हाईस्कोररले नगद ७५)), बेष्ट डिफेण्डर, म्यानअफ दि म्याच, बेष्ट गोलकिपर, बेस्ट कोच, बेस्ट स्ट्राईकर, राईजिङ प्लेयर र बेस्ट मिडफिल्डरले जनही ५५०० प्राप्त गर्नेछन्।
कुल अनुमानित बजेट २४ लाख १८ हजार ३ सय ३५ रुपैया रहेको सो प्रतियोगिताको समापन समारोहमा १ जना उत्कृष्ट पत्रकारलाई सुवास राई स्मृति पत्रकारिता पुरस्कारबाट सम्मान गरिने भएको छ। हालसम्म गोधुली रनिङकप धरान १९ नं वडाले सर्वाधिक ६ पटक जितिसकेको छभने ८ नं वडा र १७ नं वडाले ४/४ पटक जितेको छ।
२५ औं संस्करणमा आईपुग्दा क्लवले धरान नै पहिलो पटक रात्रीकालिन फुटबल खेल संचालन गरिरहेको छ।