धरानमा चलचित्र “युद्धको शहर” को विशेष प्रदर्शनी

दिव्य रोशनी(धरान)/ धरानमा नेपाली कथानक चलचित्र “युद्धको शहर”को विशेष प्रदर्शनीको आयोजना गरिएको छ।
शनिवार धरान १५ बगरकोट स्थित मेन्याङ्वो कल्याणकारी संघको भवनमा चलचित्र “युद्धको शहर” को विशेष प्रदर्शनी गरिएको हो। निर्देशक विजय संयक सुब्बा द्वारा निर्देशित चलचित्र “युद्धको शहर” पुर्वान्चल फिल्म एकेडेमीको ब्यानरमा निर्माण भएको हो।
प्रदर्शनी अघि आयोजित कार्यक्रममा निर्देशक सुब्बाले बेरोजगार युवाहरु किन र कसरी कुलतामा लागेका छन् भन्ने गहन विषयलाई चलचित्रमा उठान गरिएको बताए। उनले समाज परिवर्तनका लागी लागीपरेका राजनीतिकर्मीहरुले युवाहरुलाई चुनावी मोर्चामा सामेल गरि भोटका लागी मासु भात र केही खर्चमा सिमित बनाएको पनि चलचित्रमा समेटिएको बताए। चलचित्रमा समाजको यथार्थ घटनाक्रमलाई कलात्मक शैलीमा प्रस्तुत गरिएकोले चलचित्र आकर्षक हेर्न लायक बनिएको निर्देशक सुब्बाको भनाई छ।

याक्थुङ चलचित्रकर्मी संघ नेपालको आयोजनामा चलचित्र निर्माण तथा अभिनयको कार्यशालामा सहभागी प्रशिक्षार्थीहरुले सिकेको ज्ञाानलाई सिमित स्रोत साधनको उपयोग गरेर चलचित्रको निर्माण गरिएको हो। चलचित्रको लेखन, निर्देशन विजय संयक सुब्बाले गरेका छन्भने छायांकनमा मणिकुमार लिम्बु, नृत्य निर्देशनमा सानुराजा थेगिम र मणिकुमार लिम्बुको रहेको छ। चलचित्रमा ७८ जना कलाकार रहेका छन्। चलचित्रमा जोसेफ लिम्बु, प्रसन राई, रोजनी लिम्बु, मन्जु राई, नुमा लिम्बु, राधा फोम्बो, डम्बरकुमारी प्याङ्गो, मीना हुक्पा चोङ्बाङ पूर्णकला लिम्बु, नविन मेन्याङ्बो, नविन पराजुली, सुरज भुजेल, कृष्ण लावती, मिलन तामाङ, तिरज लिम्बु, तेज मेन्याङ्बो, सुरेन्द्र भुजेल, सानुराजा थेगिम, अनुप राउत, अमित गुरुङ, उदय कुरुङ्बाङ सुब्बा, हेम राई, विक्रम सुब्बा लगायत कलाकारहरुको अभिनय रहेको छ।
चलचित्र पैसाले मात्र नबनिने तर चलचित्र बनाउने जुनुन भए चलचित्र बनाउन सकिने निर्देशक सुब्बले बताए। उनका अनुसार चलचित्र निर्माणमा ४० जना कलाकारले व्यक्तिगत १/१ हजार संकलन गरेर चलचित्र निर्माण गरेका हुन्।
चलचित्र विशेष प्रदर्शनी कार्यक्रमका प्रमुख अतिथी धरान उपमहानगरपालिकाका उपप्रमुख अईन्द्र बिक्रम बेघाले युद्धको शहर भन्ने बित्तिकै भौतिक लडाई र वैचारिक लडाई हुने बताउँदै यो विकृति र विसंगती विरुद्धको लडाई हो भन्ने आफुले अनुमान गरेको बताए। उनले सभ्य समाज हामी आफैले बनाउने भएकाले हामी सबै नागरिकहरु एक भएर अगाडी बढ्नुपर्ने समेत बताए। अहिलेको नेतृत्वलाई सच्चाएर सुन्दर समाज निर्माणका लागी युवा नेतृहरु अगाडी बढ्नुपर्ने उनको भनाई थियो।
यसैगरी आदिवासी जनजाति चलचित्रकर्मी संघ प्रदेश १ का अध्यक्ष ज्योतिराज राईले सामुहिक रुपमा बनाईएको “युद्धको सहर” चलचित्र उदाहरणिय भएको बताए। उनले अहिलेको परिप्रेक्षमा लगानी अनुसारको चलचित्र बनिरहेकाले चलचित्र बनाउन ग्राह्रो भएपनि सामूहिक रुपमा पनि राम्रो बन्न सक्ने उदाहरण यस चलचित्रले दिएको बताए। त्यस्तै धरान १५ न.ं वडाका वडाअध्यक्ष नरेश ईवारमले धरान १५ न.ं वडा कला र संस्कृतिले पनि धनी वडा भएको बताउँदै यसै वडामा चलचित्रको विशेष प्रदर्शनीको आयोजना गर्नुले पनि त्यसको पुष्टि भएको बताए। उनले यस चलचित्रबाट सबैले केही सिक्ने अवसर पाओस् भन्ने कामना समेत गरे।
कार्यक्रमका अध्यक्ष तथा याक्थुङ चलचित्रकर्मी संघ नेपालका अध्यक्ष नविन मेन्याङ्वोले याक्थुङ चलचित्रकर्मी संघ नेपालको स्थापना भएको २/३ वर्षमै चलचित्र निर्माण गरिएको बताए। उनले कोहीपनि कलाकर तथा प्रोड्युसरहरु नडुब्ने तरिकाले प्राक्टिस गर्दै चलचित्र निर्माण गरिएको बताए। उनले चलचित्रलाई अन्य चलचित्रको रुपमा नहेरिदिन आग्रह गर्दै यस चलचित्रले धेरै कलाकारहरु जन्माउन सफल भएको समेत दावी गरे।

चलचित्र हेरिसकेपछि अग्रज रंगकर्मी तथा समाजसेवी शशी थापा सुब्बाले यस चलचित्रलाई चलचित्र नभई प्रोजेक्ट रुपमा आफुले हेरेको बताईन्। उनले यस प्रोजेक्टले धेरै कलाकारहरु जन्माएको बताउँदै भविष्यमा धरानमा धेरै राम्रा कलाकारहरु उत्पादन हुनेमा पनि आफु विश्वस्त रहेको बताईन्। उनले कलाकारहरुको अभिनयको पनि खुलेरै तारिफ गरेकी थिईन्।
चलचित्रको विशेष प्रदर्शनीमा चलचित्र निर्देशक किरण राई, कलाकार यासेली योङहाङ, नायक सुवास तामाङ, कलाकार नमिक्षा मगर चलचित्रकर्मी महासंघ कोशी प्रदेशका अध्यक्ष अरुणकुमार प्रधान, तामाङ चलचित्रकर्मी संघ नेपाल कोशी प्रदेशका अध्यक्ष लाखमान योन्जन, निर्देशक समाज कोशी प्रदेशका अध्यक्ष रबिन श्रोष्ठ, कलाकारहरु शारदा शाक्य, शशी थापा सुब्बा, नेपाल व्याटमिन्टन संघका बरिष्ठ उपाध्यक्ष चन्द्रशेखर लामा, कलाकार तथा नेपाल व्याटमिन्टन संघ कोशीका उपाध्यक्ष सुरेश नेयोङ, समाजसेवी एवं धरान व्याटमिन्टन संघका अध्यक्ष टंक लिम्बु, धरान १५ नंबर वडा सदस्य बादल भट्टराई लगायतका कलाकार, खेलाडी तथा समाजसेवीहरुको विशेष आतिथ्यता रहेको थियो। (दिव्य रोशनी साप्ताहिकबाट)