गोधुली फुटबल रनिङकपः धरान १५ फाईनलमा

दिव्य रोशनी(धरान)/ धरान ५ लाई ट्राईब्रेकरमा पराजित गर्दै १५ नं वडा धरानमा जारी गोंधुली फुटबल रनिङकपको फाईनलमा प्रवेश गरेको छ।
सोमवार राती धरान रंगशालामा भएको खेलमा धरान ५ नं वडालाई ट्राईब्रेकरमा २ का विरुद्ध ४ गोल गर्दै धरान १५ गोधुली फुटबल रनिङकपको फाईनलमा प्रवेश गरेको हो। निर्धारित खेल समयसम्म दुबैतर्फबाट गोल हुन नसकेपछि खेलको निर्णय ट्राईब्रेकरबाट लिईएको थियो। जसमा धरान १५ का लागी एरिक गुरुङ, मदन लाबुङ, आशुतोष राई र नगेन राईले गोल गरेका थिए। यसैगरी धरान ५ का लागी अमित बिके र मन्दिप राईले मात्र गोल गर्न सफल भएभने टेकराज लिम्बु र विपुल मगर गोल गर्न असफल रहे। खेलमा धरान १५ का सुगम जिमी म्यान अफ दि म्याच घोषित भए। उनले नगद २५ सय हात पारे।
मंगलवारको दोस्रो तथा अन्तिम सेमिफाईनल खेल धरान १७ नं वडाका विरुद्ध १४ नं वडाका बिच हुने आयोजक संस्थाका उपाध्यक्ष सतिस केसीले बताए।

प्रतियोगितामा धरानका २० वटा वडामध्ये २ र ७ नं वडाले सहभागिता जनाएका छैनन्। प्रतियोगिताका विजेताले नगद १ लाख ५० हजार सहित रनिङ ट्रफि प्राप्त गर्नेछन्भने उपविजेता टिमले नगद ७५ हजार सहित ट्रफि र मेडल प्राप्त गर्नेछन्। यसैगरी विजेता तथा उपविजेता टिमलाई धरान १८ नं वडाका वडाअध्यक्ष नरेन्द्र कुमार राई (प्रविन) द्धारा थप २५/२५ हजार प्रदान गरिने भएको छ। यसैगरी प्रतियोगिताका व्यक्तिगत पुरस्कारहरुमा वेस्ट प्लेयरले नगद १५ हजार, हाईस्कोररले नगद ७५००, बेष्ट डिफेण्डर, म्यानअफ दि म्याच, बेष्ट गोलकिपर, बेस्ट कोच, बेस्ट स्ट्राईकर, राईजिङ प्लेयर र बेस्ट मिडफिल्डरले जनही ५५०० प्राप्त गर्नेछन्।
कुल अनुमानित बजेट २४ लाख १८ हजार ३ सय ३५ रुपैया रहेको सो प्रतियोगिताको समापन समारोहमा १ जना उत्कृष्ट पत्रकारलाई सुवास राई स्मृति पत्रकारिता पुरस्कारबाट सम्मान गरिने भएको छ। हालसम्म गोधुली रनिङकप धरान १९ नं वडाले सर्वाधिक ६ पटक जितिसकेको छभने ८ नं वडा र १७ नं वडाले ४/४ पटक जितेको छ।
२५ औं संस्करणमा आईपुग्दा क्लवले धरान नै पहिलो पटक रात्रीकालिन फुटबल खेल संचालन गरिरहेको छ।