९ औं हराईजन बास्केटबल रनिङ कपःउद्धघाटन खेलमा आर्मी र धरान कालो विजयी

दिव्य रोशनी(धरान)/
९ औं हराईजन बास्केटबल रनिङ कपको उद्धघाटन खेलमा त्रिभुवन आर्मी र धरान कालोले महत्वपूर्ण ३/३ अंक हासिल गरेको छ।
धरान १७ स्थित श्री माध्यमिक विद्यालय परिसरको बास्केटबल कोर्टमा शनिवार भएको प्रतियोगितामा आर्मी र धरान कालोले महत्वपूर्ण ३/३ अंक हासिल गरेको हो। लिग चरण अन्तर्गत भएको पहिलो खेलमा त्रिभुवन आर्मीले धरान हरियोलाई ९९–५५ स्कोरले हराउँदै महत्वपुर्ण ३ अंक हासिल गरेको छ । आर्मीले खेलको पहिलो क्वाटरमा २३–१६, दोस्रो क्वाटरमा २६–१८, तेस्रो क्वाटरमा ३०– ७ र चौथो क्वाटरमा २०–१४ स्कोरले धरानलाई हराएको थियो । खेलको म्यान अफ द म्याच आर्मीका निकेश मगर घोषित भए। उनले नगद ५ हजार सहित मेडल हात पारे ।
यसैगरी शनिवार नै भएको दोस्रो खेलमा धरान (कालो) ले झापालाई ९६–४२ को फराकिलो स्कोरले हराउँदै महत्वपूर्ण ३ अंक बटुलेको छ। खेलमा धरान कालोले झापालाई पहिलो, दोस्रो, तेस्रो र चौथो क्वाटरमा २७–७, २५–१३, १९–१६ र २७–७ स्कोरले हराएको थियो। खेलको म्यान अफ द म्याच धरानका कबिर मगर घोषित भए। उनले नगद ५ हजार सहित मेडल हात पारे।

उद्धघाटन समारोहमा धरानका निवर्तमान मेयर तिलक राई प्रमुख अतिथी रहेका थिए। उनले धरानमा बास्केटवल खेलको विकासमा हराईजनको योगदान उल्लेखनीय रहेको बताए। राष्ट्रियस्तरका खेलाडी उत्पादन गर्न यस प्रतियोगिताले सघाउ पुगेको बताउँदै निवर्तमान मेयर राईले धरानको बास्केटबल खेलको विकासका लागी प्रतियोगिताहरु नियमित गर्न आयोजक संस्थालाई आग्रह समेत गरे।
यसैगरी कार्यपालिका सदस्य तथा सामाजिक विकास समिति संयोजक सृजना नेपालले आगामी दिनहरुमा बास्केटबल खेलमा महिलाहरुको पनि सहभागिता हुनुपर्नेमा जोड दिईन्। उनले खेलहरुले खेलाडीहरुको भौतिक संगै शारीरिक,मानसिक र बौद्धिकताको पनि विकास गर्ने बताउँदै यसले जातीय संस्कार संस्कृतिलाई पनि आदन/ प्रदान गर्न सघाउ पुर्याउने बताईन्।
हराईजन क्लब धरान १७ को आयोजना तथा धरान उपमहानगरपालिकाको संयोजनमा भएको सो प्रतियोगिताको बिजेताले नगद १ लाख ५१ हजार १ सय ११ रुपैयाँ सहित ट्रफी, मेडल र प्रमाणपत्र पाउनेछन्भने उपबिजेता टिमले नगद ७५ हजार ५ सय ५५ रुपैयाँ सहित ट्रफी, मेडल र प्रमाणपत्र पाउनेछ। बिजेता तथा उपबिजेता टिमलाई धरान १८ न.ं वडाका वडाअध्यक्ष प्रविण राईको सौजन्यमा थप २५/२५ हजार नगद पनि प्रदान गरिने भएको छ। यसैगरी प्रतियोगिताका सर्वोत्कृष्ट खेलाडीले नगद २५ हजार र उदयीमान खेलाडीले नगद १० हजार पुरस्कार पाउने क्लबका अध्यक्ष श्रीभक्त राईले जानकारी दिए। आज आईतवारहुने पहिलो खेल विशाल मिलन केन्द्र काठमाण्डौ र धरान निलोका बिच हुनेछभने दोस्रो खेल मोरङ र झापाका बिच हुने हुनेछ।
चैत्र १२ गतेसम्म सञ्चालन हुने प्रतियोगितामा त्रिभुवन आर्मी क्लब, बिशाल मिलन केन्द्र काठमाण्डौ, मोरङ बास्केटबल संघ, झापा बास्केटवल संघ, धरान टिम (निलो) र धरान टीम (कालो) सहभागी रहेको छ। (दिव्य रोशनी साप्ताहिकबाट)