गोधुली फुटबल रनिङकप रात्रिकालिन समयमा हुँदै

धरानमा पहिलो पटक रात्रीकालिन फुटबल खेलको आयोजना हुने भएको छ।
गोधुली क्लवको आयोजनामा हुन लागेको २५ औं संस्करण अन्तर्गत खेलहरु रात्रीकालिन समयमा हुन लागेको हो। बुधवार आयोजित पत्रकार सम्मेलनमा क्लवका उपााध्यक्ष सतिस केसीले यहि चैत्र ७ गते देखी चैत्र २१ गतेसम्म धरान रंगशालामा हुनलागेको सम्पूर्ण खेलहरु रात्रीकालिन समयमा संचालन हुने बताए। उनले रात्रिकालिन खेलका लागी ५ स्थानमा अस्थाईरुपमा बासका टावर बनाई फ्लड लाईट जडान गरिएको समेत जानकारी दिए।

धरान उपमहानगरपालिकाको संयोजन तथा टेस्टि टेस्टि नुडल्सको मुख्य प्रायोजनमा हुने अन्तरवडा स्तरिय खेलमा धरानका २० वटा वडामध्ये २ र ७ नं वडाले सहभागिता जनाएका छैनन्। प्रतियोगिताका विजेताले नगद १ लाख ५० हजार सहित रनिङ ट्रफि प्राप्त गर्नेछन्भने उपविजेता टिमले नगद ७५ हजार सहित ट्रफि र मेडल प्राप्त गर्नेछन्। यसैगरी विजेता तथा उपविजेता टिमलाई धरान १८ नं वडाका वडाअध्यक्ष नरेन्द्र कुमार राई (प्रविन) द्धारा थप २५/२५ हजार प्रदान गरिने भएको छ। यसैगरी प्रतियोगिताका व्यक्तिगत पुरस्कारहरुमा वेस्ट प्लेयरले नगद १५ हजार, हाईस्कोररले नगद ७५००, बेष्ट डिफेण्डर, म्यानअफ दि म्याच, बेष्ट गोलकिपर, बेस्ट कोच, बेस्ट स्ट्राईकर, राईजिङ प्लेयर र बेस्ट मिडफिल्डरले जनही ५५०० प्राप्त गर्नेछन्।
कुल अनुमानित बजेट २४ लाख १८ हजार ३ सय ३५ रुपैया रहेको सो प्रतियोगिताको समापन समारोहमा १ जना उत्कृष्ट पत्रकारलाई सुवास राई स्मृति पत्रकारिता पुरस्कारबाट सम्मान गरिने भएको छ। हालसम्म गोधुली रनिङकप धरान १९ नं वडाले सर्वाधिक ६ पटक जितिसकेको छभने ८ नं वडा र १७ नं वडाले ४÷४ पटक जितेको छ।