ज्येष्ठ नागरिकहरु मेयर साम्पाङसंगै नाचे छम्छमी

दिव्य रोशनी(धरान)/
जिवनको उत्तराद्र्धमा लागेपछि ज्येष्ठ नागरिकहरुलाई छुट्टै मनोरञ्जन दिलाउन तथा समाजमा घुलमिल गराउन धरान उपमहानगरपालिकाले मनोरञ्जनात्मक कार्यक्रमको आयोजना गर्दै आएको छ।
यसै सन्दर्भमा बिहिवार धरान ४ खैरेनीटारमा उपमहानगरपालिकाले ज्येष्ठ नागरिकहरुका लागी मनोरञ्जनात्मक कार्यक्रमको आयोजना गरेको थियो। घुँडा र कम्मरको समस्या भएपनि कार्यक्रममा उपस्थित ज्येष्ठ नागरिकहरु छम्छमी नाचेका देखिन्थे। नाच्दै, थकाई मार्दै गरेकी धरान १५ स्तुति मार्गकी ७६ वर्षिय लक्ष्मी तामाङले धेरै समयपछि धित मरुन्जेल नाचेको बताईन्। उनले आफ्नो ढाड दुख्ने समस्या भएपनि नाच्ने रहरले नै कार्यक्रममा आएको बताईन्। उनले भनिन् “के गर्नु बुढी मान्छे, अझ नाच्ने मन छ नी , ढाड दुखेर धेरैबेर नाच्न सकिएन।”
अरुले नाचगान हुँदैछ भनेर सुनेपछि उनी यहाँ आएकी बताईन्। “नाचगान भयो, खुसी लाग्यो। यसो कहिलेकाही यस्ताखाले कार्यक्रममा हिडिरह्यो, बोलरह्यो भने कुरा बुझिन्छ” उनले भनिन्।
सोही ठाउँबाट आएकी ७४ वर्षिया हिमा कुमारी दर्जीले पनि घरमा छोराले यस्तो रमाईलो कार्यक्रम छ भनेर जानकारी दिएपछि कार्यक्रममा आएको बताईन्। उनले नगरको अभिभावक मेयर हर्क साम्पाङसंँग नाच्न पाउदा बेग्लै आनन्दको अनुभूति भएको बताईन्। उनले भनिन् “मेयर साव आउनु भयो सबैजना संँगै नाच्यौं रमाईलो भयो।”
यसैगरी धरान ४ किरात बस्तीकी ७१ वर्षिया रत्न माया चाम्लिङ राईले यस्ता कार्यक्रममा आफु पहिलो पटक सहभागी भएको बताईन्। उनले यस्ता कार्यक्रमहरुले एकछिन भएपनि दुःख भुल्ने र रमाईलो हुने भएकाले फेरि फेरि आयोजना गरिनुपर्नेमा जोड दिईन्।
ज्येष्ठ नागरिकहरुलाई मनोरञ्जन दिने उद्धेश्यले आयोजना गरिएको कार्यक्रममा मेयर हर्क साम्पाङले बुढेसकालमा साथी नहुने कारणले एकदिन भएपनि जमघट गराएर मनोरञ्जन दिलाउने काम गर्दै आएको बताए। उनले छोरा बुहारीहरु आफ्नै काममा लागेपछि ज्येष्ठ नागरिकहरुसंँग बोल्ने साथी नहुने साथै नातानातिनीहरु सँंग पनि कुरा नमिल्ने भएकाले पनि मनोरञ्जनात्मक कार्यक्रमको आयोजना गर्नुपरेको बताए। उनले भने “छोराछोरी आफ्नै काममा लागेपछि बृद्धबृद्धाहरुसँंग बोल्ने साथी हुँदैन, नातानातीसँंग कुरा मिल्दैन अनि एक्लो महशुस हुने रहेछ। त्यही भएर बुढेसकालमा साथी नहुने कारणले एकदिनभएपनि जमघट गराएर मनोरञ्जन दिलाउने काम गछौं। त्यही भएर आज हामी यहाँ आएका छौं।”
मेयर साम्पाङले ज्येष्ठ नागरिकहरुसंँग बोल्ने, साथी नहुने कारणले पनि ज्येष्ठ नागरिकहरुलाई नियमित रुपमा जमघट गराउन भवन नै बनाउन गोर्खा वेलफेयर ट्रष्टलाई अनुरोध गरेको समेत खुलासा गरे। उनले एउटा राम्रो पार्क भएको भवन बनाउन सके सबैले मनोरञ्जन गर्न सकिने र वृद्ध वुवाआमाहरुलाई घरघरमै गएर लिएर आउने र मनोरञ्जन गराउने बारे छलफल भईरहेको समेत जानकारी दिए।
“खुट्टा दुखिरहेको होला, ढाड दुखिरहेको होला, जिन्दगी छोटो छ, के पिर लिईरहनु? हामी ननाचे आमाबुवा नाच्न हुन्न होला? आउनुस् सबैजना नाच्नुपर्छ है भन्दै मेयर साम्पाङ नाच्न थालेपछि सबै बुवा आमाहरु हौसिदै नाच्न थालेका थिए। मेयर साम्पाङले पहिलो पटक आफ्ना आमालाई पनि लिएर आएका थिए। कार्यक्रममा मेयर साम्पाङका आमापनि खुशी हुँदै जाेंसिदै गीतको तालमा छम्छमी नाचिरहेका देखिन्थे।

धरान ४ नं. वडाका वडाअध्यक्ष धन बहादुर राईले मनोरञ्जनात्मक कार्यक्रममा ज्येष्ठ नागरिकहरु उत्सुकता साथ सहभागीभएको बताए।
कार्यक्रमका सभाध्यक्ष ज्येष्ठ नागरिक मिलन केन्द्रका अध्यक्ष चक्र बहादुर आचार्यले यस्ता मनोरञ्जनात्मक कार्यक्रमले ज्येष्ठ नागरिकहरुमा खुसी संँगै आत्मबल बढ्ने समेत बताए। उनले मेयर साम्पाङको यो अभियान हरेक वडावडामा पुग्नुपर्ने समेत बताए।
सोहीक्रममा अध्यक्ष आचार्यले मिटिङमा टाढा टाढाबाट आएका ज्येष्ठ नागरिकहरु कहिलेकाही बिरामी हुँदा फर्किन गाडी भाडा नहुँदा त्यसको लागी कोषको खडा गरिनुपर्ने माग समेत राखे। उनले ज्येष्ठ नागरिकहरुको मिटिङमा अहिले वडाबाट महिनामा एक पटक चिया, नास्ताका लागी ज्येष्ठ नागरिक मिलन केन्द्रलाई १ हजार रुपैयाँ दिने गरेको समेत बताए। उनका अनुसार४ नं. वडामा हरेक महिनाको ५ गते बैठक हुने गरेको छ। हाल ४ न.ं वडामा २ सय ७२ जना ज्येष्ठ नागरिक रहेका छन्।
ज्येष्ठ नागरिकहरुलाई मनोरञ्जनका लागी वडा कार्यालयले माईक, मादल, हारमोनियम सँंगै कुर्सी, टेवल, दराज पनि उपलब्ध गराएको छ। वडाको विकट गाउँ हर्दिया, दानाबारीमा समेत ज्येष्ठ नागरिक मिलन केन्द्रको उपसमिती समेत गठन गरिएको अध्यक्ष आचार्यले बताए। ४ नं. वडा ग्रामिण भेग भएकाले पनि सडक आवत–जावतमा कठिनाई भएकाले पनि बैठकमा अधिकतम २० जना र न्यूनतम ५ जना मात्र सहभागी हुने अध्यक्ष आचार्यको भनाई छ। उनले अन्य वडाहरुले ज्येष्ठ नागरिकहरुलाई तीर्थधाममा लाने गरेको बताउँदै आफ्नो वडाले पनि ज्येष्ठ नागरिकहरुलाई तीर्थधाममा लैजानुपर्ने माग राखे।
मनोरञ्जनात्मक कार्यक्रमपछि सहभागी ज्येष्ठ नागरिकहरुले वडामा समय समयमा स्वास्थ्य शिविर आयोजनाको माग राखेका थिए। कार्यक्रममा सहयोगी दाताहरुबाट संकलित नगद ६ हजार रुपैयाँ ज्येष्ठ नागरिक तथा मिलन केन्द्रलाई हस्तान्तरण गरिएको थियो। (दिव्य रोशनी साप्ताहिकबाट)