चलचित्र “अन्जिला” देशैभरी हाउसफुल, धरानमा उपहार बाँडियो
दिव्य रोशनी(धरान)/ नेपाली महिला राष्ट्रिय फुटबल टोलीकी कप्तान एन्जिला तुम्बापो सुब्बाको जीवनमा आधारित चलचित्र “अञ्जिला” हेर्न दोस्रो शनिवार जनसागर उर्लिएको छ।
निर्देशक मिलन चाम्सका अनुसार, पहिलो शनिवारको तुलनामा दोस्रो शनिवारको व्यापार झन्डै दोब्बर भएको छ। देशभरका हलहरूमा दर्शकहरूको उत्साहजनक सहभागिता हेर्दा यस चलचित्रको लोकप्रियता दिनानुदिन अत्यधिक बढ्दै गएको प्रस्ट भएको छ।
शनिवार निर्देशक चाम्स, निर्माता तथा कलाकार प्रेमकुमार श्रोष्ठ, सह–निर्माता विनोद अग्रवाल र एन्जिलाको आमाको भूमिकामा अभिनय गरी व्यापक प्रशंसा पाइरहेकी सिर्जना सुब्बा सहितको टोलीले काठमाडौंका विभिन्न हलहरूमा दर्शकसँग साक्षात्कार गरेका छन्। काठमाडौंको अष्टनारायण हलमा एक हजार सिट क्षमताको हलमा दिनभर हाउसफुल भएको थियो भने देशभरका सबै शोहरू हाउसफुल भएका छन्। रिलिजको पहिलो दिन १०५ शो प्राप्त गरेको चलचित्रले दोस्रो हप्ताको शनिवार २०० भन्दा धेरै शो प्राप्त गरेको थियो।
यसैगरी शनिवार नै धरानको फ्रेण्ड्स सिनेमाजले चलचित्र “अन्जिला” लाई ६ शो दिएको थियो। ती सबै शो हरु हाउसफुल भए। उक्त शो मा चलचित्र निर्माण टिमको तर्फबाट “अन्जिला” को नाम अंकित जुत्ता उपहार दिएको थियो । दर्शकहरुले काटेको टिकटबाट लक्की ड्र मार्फत दुई जनालाई जुत्ता उपहार प्रदान गरिएको थियो। उपहार चलचित्र निर्माण टिमका तर्फबाट निर्माता ज्योतीराज राईले प्रदान गरेका थिए। चलचित्रको सफलताबाट पुलकित बनेका निर्देशक चाम्सले भने, “चलचित्र निर्देशनको मेरो करियरमा यति धेरै खुसी कहिल्यै भएको थिइनँ। “अञ्जिला” लाई दर्शकहरूले यति धेरै माया गर्नुहुन्छ भन्ने मैले कल्पना गरेको थिइनँ। पहिलो दिनदेखि नै राम्रो प्रतिक्रिया सहित उत्साहजनक व्यापार भइरहेको भए पनि दोस्रो हप्ताको शनिवारको शो संख्या र बम्पर व्यापारले उत्साहित बनाएको छ। चलचित्र हेरेर दर्शकहरू भावुक हुनुभएको छ, र यो चलचित्रले उनीहरूलाई प्रेरित गरिरहेको देख्दा हाम्रो टिमको मेहनत सार्थक भएको अनुभूति भइरहेको छ।” निर्देशक चाम्सले दर्शकको लहर छिट्टै रोकिने सम्भावना नरहेको समेत बताए।
टिकटक, फेसबुक, युट्युब लगायतका सामाजिक सञ्जालहरूमा पनि चलचित्र “अञ्जिला”को व्यापक प्रशंसा भइरहेको छ, जसले चलचित्रको लोकप्रियतालाई अझ बढाइरहेको छ। यस चलचित्रले नेपाली चलचित्र उद्योगमा नयाँ कीर्तिमान स्थापित गर्ने सम्भावना देखाएको छ।
यस चलचित्रलाई प्रेमकुमार श्रोष्ठले निर्माण गरेका हुन्। यस चलचित्रमा कलाकार समेत रहेका श्रोष्ठ एन्जिलाका “गड फादर” हुन्। शीर्ष भूमिकामा एन्जिला आफैले अभिनय गरेकी छिन्।
चलचित्रमा माओत्से गुरुङ र दयाहाङ राईले एञ्जिलाका बुबाको भूमिका निर्वाह गरेका छन् भने सिर्जना सुब्बाले आमाको भूमिका निभाएकी छिन्। त्यस्तै सुमिन गुरुङले दाजुको भूमिका, सुनिल थापाले कोचको भूमिका निभाएका छन्। चलचित्रमा बुद्धि तामाङ, विजय बराल, मञ्जु श्रोष्ठ लगायतका कलाकारहरूको समेत अभिनय रहेको छ। (दिव्य रोशनी साप्ताहिकबाट)
