धरानमा पहिलो पटक रात्रीकालिन फुटबलः धरान ५ को विजयी शुरुवात

दिव्य रोशनी(धरान)/गोधुली फुटबल रनिङकपको उद्धघाटन खेलमा धरान ५ नं वडा विजयी भएको छ।
विहिवार राती धरान रंगशालामा भएको उद्धघाटन खेलमा धरान १६ नं वडालाई १ का विरुद्ध २ गोल गर्दै धरान ५ नं वडा विजयी बनेको हो। खेलमा धरान ५ का तर्फबाट सुरज ईङ्नाम र तिल बिक्रम लावतीले गोल गरेका थिएभने धरान १६ का तर्फबाट एकमात्र सान्तवना गोल सरुन श्रेष्ठले गरेका थिए। खेलमा धरान ५ का तिल बिक्रम लावती घोषित भए। उनले नगद १५ सय हात पारे।
ईतिहासमै पहिलो पटक धरानमा रात्रीकालिन फुटबल खेलको आयोजना गरिएको थियो। आयोजक गोधुली क्लवले २५ औं संस्करणलाई भव्य बनाउन धरान १६ स्थित रंगशालामा फ्लडलाई जडान गरेको थियो। धरानमा पहिलो पटक रात्रीकालिन फुटबल खेल हुने भएपछि प्याराफिटहरु दर्शकहरुले भरिएका थिए। आतिसबाजीका साथ धरानका चर्चित गायक पूर्ण राई एण्ड दाजुभाईको प्रस्तुतीले गोधुलीको २५ औं संस्कारणको उद्धघाटन खेललाई भव्य बनाएको थियो।
उद्धघाटन समारोहका प्रमुख अतिथी धरान १७ का वडाअध्यक्ष सूर्य भट्टराई(मनोज)ले गोधुली क्लवले धरानमा पहिलो पटक फ्लडलाईट जडान गरेर धरानको रात्रीकालिन फुटबललाई थप रौनकता थपेको बताए। यसैगरी विशेष अतिथी कोशी प्रदेश फुटबल संघका अध्यक्ष किशोर राईले धरानमा रात्रीकालिन फुटबल खेलको लागी स्थाई रुपमा फ्लडलाईट जडान गर्न प्रदेश र केन्द्रिय सरकारको ध्यानाकर्षण गरेको बताए।

शुक्रवारको खेल धरान १० नं वडा र १२ नं वडाका बिच हुने आयोजक संस्थाका उपाध्यक्ष सतिस केसीले बताए। प्रतियोगितामा धरानका २० वटा वडामध्ये २ र ७ नं वडाले सहभागिता जनाएका छैनन्। प्रतियोगिताका विजेताले नगद १ लाख ५० हजार सहित रनिङ ट्रफि प्राप्त गर्नेछन्भने उपविजेता टिमले नगद ७५ हजार सहित ट्रफि र मेडल प्राप्त गर्नेछन्। यसैगरी विजेता तथा उपविजेता टिमलाई धरान १८ नं वडाका वडाअध्यक्ष नरेन्द्र कुमार राई (प्रविन) द्धारा थप २५/२५ हजार प्रदान गरिने भएको छ। यसैगरी प्रतियोगिताका व्यक्तिगत पुरस्कारहरुमा वेस्ट प्लेयरले नगद १५ हजार, हाईस्कोररले नगद ७५००, बेष्ट डिफेण्डर, म्यानअफ दि म्याच, बेष्ट गोलकिपर, बेस्ट कोच, बेस्ट स्ट्राईकर, राईजिङ प्लेयर र बेस्ट मिडफिल्डरले जनही ५५०० प्राप्त गर्नेछन्।
कुल अनुमानित बजेट २४ लाख १८ हजार ३ सय ३५ रुपैया रहेको सो प्रतियोगिताको समापन समारोहमा १ जना उत्कृष्ट पत्रकारलाई सुवास राई स्मृति पत्रकारिता पुरस्कारबाट सम्मान गरिने भएको छ। हालसम्म गोधुली रनिङकप धरान १९ नं वडाले सर्वाधिक ६ पटक जितिसकेको छभने ८ नं वडा र १७ नं वडाले ४/४ पटक जितेको छ।