यायोक्खाद्वारा किरात सिरिजंगा लिपी प्रशिक्षण (भिडियो सहित)

दिव्य रोशनी(धरान)/
धरानमा दुईदिने किरात सिरिजंगा लिपी प्रशिक्षण शुरु भएको छ।
किरात राई यायोक्खा धरान उपमहानगर समिति सुनसरीको आयोजनामा चैत्र ९ गते शनिवार देखी आफ्नै भवन धरान १० मा लिपी प्रशिक्षण शुरु भएको हो। दुईदिने किरात सिरिजंगा लिपीलाई किरात प्रज्ञा प्रतिष्ठानका सदस्य तथा प्रशिक्षक गणेश वाम्वुले राईले सहजीकरण गरिरहेका छन्।
लिपी प्रशिक्षणको उद्धघाटन धरान उप–महानगरपालिकाका उपमेयर आईन्द्र विक्रम बेघाले गरेका छन्। उनले प्रथम किराती राजा यलम्बरको मुर्तिमा माला लगाई दिप प्रज्वलन गरी कार्यकमको उदघाटन गरेका थिए।
उद्धघाटन समारोहलाई सम्बोधन गर्दै उपमेयर बेघाले भाषा, लिपी, धर्म, संस्कार र संस्कृति बचाउन पुस्ताहस्तान्तरण गर्नुपर्ने बताए। उनले नेपाली जनताको बलिदानीले आएको अहिलेको संघीय लोकतान्त्रिक गणतन्त्र व्यवस्थाले भाषिक जातिय सांस्कृतिक अधिकारलाई सुनिश्चित गरेको बताए।
एक फरक प्रसंगमा उपमेयर बेघाले केही व्यक्तिहरु अहिलेको व्यवस्था छाडी उल्टो हिडेको बताएका छन्। उनले केही व्यक्तिहरु राजा आउ देश बचाउ भन्दै अहिलेको व्यवस्थाको विरोध गरेको देख्दा आफु छक्क परेको बताए।
आदिवासी जनजातिका हक र अधिकार खोसेका उही सामन्ती व्यवस्थालाई केही व्यक्तिहरु ल्याउन लागि परेको उनको भनाई थियो।

कार्यक्रममा किराया जिल्ला अध्यक्ष राजेन्द्र राईले तालिममा सिकेका कुराहरुलाई वडामा गएर अन्यलाई पनि सिकाउन अनुरोध गरे।उनले आगामी कार्यक्रमका लागी पनि सहभागीहरु बाटै प्रशिक्षक चुनिने भएकाले सुक्ष्मरूपमा तालिममा सिक्न आग्रह समेत गरे। उनले भने “तपाईहरुलाई सिकाउन अब गणेश राई आउदैनन्, तपाईहरु राम्रोसंग सिक्नुहोस्, अन्यलाईपनि प्रशिक्षण दिनुपर्छ।”
कार्यक्रममा यायोक्खा नगरका उपाध्यक्ष लक्ष्मी राईले युवा पुस्ताहरुमा आफ्नो संस्कार सस्कृतिलाई बचाई राख्न किरात सिरिजंगा लिपी प्रशिक्षणको आयोजना गरिएको बताईन्। उनिले भाषा, साहित्य उत्थानका लागी स्थानिय सरकारले छुट्याएको बजेट हात्तिको मुखमा जिरा सरह भएको बताईन्। आयोजक संस्थाबाट बजेटको गुनासो उठेपछि उपमेयर बेघाले नगरपालिकाले छुट्याएको बजेट वास्तवमै कमी भएको आफुलाईपनि महशुस भएकाले आगामी बजेटमा छलफल गर्न सकिने बताएका थिए।
यायोक्खा नगर सचिव गीता राईको संचालनमा रहेको सो उद्धघाटन कार्यक्रम अध्यक्ष लिला राईको अध्यक्षतामा सम्पन्न भएको थियो। (दिव्य रोशनी साप्ताहिकबाट)