३४ औं विश्व एड्स दिवसको अवसरमा धरानमा पाँच जना सम्मानित

(दिव्य रोशनी,धरान)/ ‘असमानता हटाऔं, एड्स अन्त्य गरौं’ भन्ने नाराका साथ आज धरानमा ३४ औं विश्व एड्स दिवस मनाईएको छ ।
धरान उपमहानगरपालिकामा आयोजित कार्यक्रममा एचआईभी रोकथाम तथा न्यूनिकरणको क्षेत्रमा महत्वपूर्ण योगदान पुर्याएका पत्रकार, चिकित्सक र अभियान्तालाई सम्मान गरिएको हो । कार्यक्रमका प्रमुख अतिथि समेत रहेका मेयर तिलक राईले पत्रकार विकास चाम्लिङ राई, विपी प्रतिष्ठानका ए.एस.एस. प्रोफेसर डाक्टर श्याम प्रसाद काफ्ले, ए.आर.टी. काउसिलर निशा श्रेष्ठ, अभियान्ता कृष्ण शुन्दर राई र स्व. नरेशलाल श्रेष्ठ (रञ्जना श्रेष्ठ)लाई सम्मान पत्र प्रदान गरी सम्मान गरेका थिए।
कार्यक्रममा मेयर राईले समाजमा विगतमा भन्दा अहिले एचआईभी संक्रमित विरामीलाई हेर्ने दृष्टिकोण परिवर्तन हुँदै आएको बताए। उनले एचआईभी संक्रमितलाई हेर्ने दृष्टिकोण नबदलिएसम्म संक्रमितहरु खुल्न नसक्ने भएकोले उनीहरुको स्वास्थ्यमा पहुँच पुर्याउनका लागि सबैले सक्रिय भएर लाग्नुपर्नेसमेत बताए । मेयर राईले स्वस्थ्य जीवन जीउनु हरेक नागरिकको मौलिक अधिकार भएको बताउँदै एचआईभी संक्रमित भएर बाँचिरहेका व्यक्तिहरुलाई अन्य व्यक्तिहरुले जस्तो सम्मानपूर्वक बाँच्न पाउने वातावारण सृजना गर्नुपर्नेमा जोडदिएका थिए।
कार्यक्रममा धरान पोजेटिभ समूहका उपाध्यक्ष रोमन राईले धरान उपमहानगरपालिकाको अयोजना तथा धरान पोजेटिभ समूहको संयोजनमा कार्यक्रम आयोजना गरिएको जानकारी दिए। उनले हरेक वर्ष डिसेम्बर १ तारिखमा मनाइने विश्व एड्स दिवसलाई प्रभावकारी बनाउन समुदाय तहमा जनचेतना बढाउन आवश्यक रहेको समेत बताए।
कार्यक्रममा नेपाल पत्रकार महासंघ सुनसरीका अध्यक्ष जनकऋषि राई, धरान उपमहानगरपालिका स्वास्थ्य महाशाखा प्रमुख उमेश मेहता, सामाजिक अभियन्ता लगायतको उपस्थिति रहेको थियो।